சிறுவாணி மற்றும் பில்லூர் நீர்மட்டம் தொடர்ந்து குறைந்து வருவதால், நகர மக்கள் தண்ணீரை சிக்கனமாக பயன்படுத்த வேண்டும்!

சமீபத்திய அறிக்கையின்படி, கோவை மாநகராட்சியில் உள்ள 32 வார்டுகள் மற்றும் 7 நகராட்சிகள், 10 பஞ்சாயத்துகள் உட்பட 28 கிராமங்களுக்கு குடிநீர் வழங்கும் சிறுவாணி அணையின் நீர்மட்டம், அதன் மொத்த கொள்ளவான 45 அடிக்கு எதிராக தற்போது 15.7 அடியாக உள்ளது.

இதற்கிடையில், மாநகராட்சிக்கு உட்பட்ட 68 வார்டுகளுக்கு தண்ணீர் வழங்கப்படும் பில்லூர் அணையின் நீர்மட்டம் தற்போது 62.5 அடியாக உள்ளது. இந்த அணையில் இருந்து 1-3 பில்லூர் குடிநீர் திட்டங்களுக்கு 40 கோடி லிட்டர் தண்ணீர் எடுக்கப்படுகிறது. மக்களின் தேவைக்காக கூடுதலாக 3 கோடி லிட்டர் தண்ணீர் எடுக்கப்படுகிறது.

கடந்த ஆண்டு பருவமழை போதிய அளவு பெய்யாததாலும், தற்போது கோடை வெயிலின் தாக்கத்தாலும் பெரும் பாதிப்பு ஏற்பட்டுள்ளது. கோடை மழை மற்றும் பருவமழை மீது கோவை மாநகராட்சி நம்பிக்கை வைத்துள்ளது.